नागार्जुन नगरपालिका वडा नं. ३ को आयोजनामा Ichangu Narayan Health Post मा मानसिक स्वास्थ्य तथा मनोसामाजिक सहयोग सम्बन्धी अभिमुखीकरण कार्यक्रम सम्पन्न भएको छ।
समुदायस्तरमा मानसिक स्वास्थ्यप्रति जनचेतना अभिवृद्धि गर्ने तथा मानसिक स्वास्थ्य समस्याको समयमै पहिचान, व्यवस्थापन र आवश्यक सहयोगका विषयमा जानकारी प्रदान गर्ने उद्देश्यले कार्यक्रम आयोजना गरिएको थियो। कार्यक्रममा स्थानीय जनप्रतिनिधि, स्वास्थ्यकर्मी, महिला स्वास्थ्य स्वयंसेविका तथा समुदायका विभिन्न वर्गका नागरिकहरूको सहभागिता रहेको थियो।
अभिमुखीकरण कार्यक्रममा मानसिक स्वास्थ्यको महत्व, मानसिक तनावका कारण र प्रभाव, मनोसामाजिक सहयोगका आधारभूत पक्ष, मानसिक स्वास्थ्य समस्या भएका व्यक्तिप्रति अपनाउनुपर्ने व्यवहार तथा उपलब्ध स्वास्थ्य सेवाका विषयमा जानकारी प्रदान गरिएको थियो। साथै मानसिक स्वास्थ्यसम्बन्धी भ्रम र विभेद न्यूनीकरण गर्दै सकारात्मक सोच तथा सहयोगी वातावरण निर्माण गर्नुपर्ने आवश्यकतामा जोड दिइएको थियो।
कार्यक्रमका सहभागीहरूले मानसिक स्वास्थ्यका विषयमा खुलेर छलफल गर्नुका साथै दैनिक जीवनमा मानसिक स्वास्थ्यलाई कसरी सुदृढ बनाउन सकिन्छ भन्ने विषयमा जानकारी प्राप्त गरेका थिए। मानसिक स्वास्थ्यलाई शारीरिक स्वास्थ्यसरह महत्व दिनुपर्ने तथा आवश्यक परेमा स्वास्थ्य संस्थाबाट परामर्श र उपचार सेवा लिन हिच्किचाउनु नहुने सन्देश पनि कार्यक्रममा प्रवाह गरिएको थियो।
नागार्जुन नगरपालिका वडा नं. ३ ले समुदायमा मानसिक स्वास्थ्यसम्बन्धी चेतना अभिवृद्धि गर्दै नागरिकलाई आवश्यक जानकारी र सहयोग उपलब्ध गराउने उद्देश्यले यस्ता कार्यक्रमलाई आगामी दिनमा समेत निरन्तरता दिने जनाएको छ। कार्यक्रमले मानसिक स्वास्थ्यप्रति सकारात्मक सोच विकास गर्न तथा समुदायमा सहयोगी वातावरण निर्माण गर्न महत्वपूर्ण योगदान पुर्याएको विश्वास लिइएको छ।
