साईपाटा सजावट सम्बन्धी हस्तकला तालिमको समापन समारोह सम्पन्न

स्थानीय गतिविधी

गृहपृष्ठ
स्थानीय गतिविधी
साईपाटा सजावट सम्बन्धी हस्तकला तालिमको समापन समारोह सम्पन्न

साईपाटा सजावट सम्बन्धी हस्तकला तालिमको समापन समारोह सम्पन्न

आइतबार, असार १४, २०८३ Nagarjun Post

नागार्जुन नगरपालिकाको आयोजनामा वडा नं. ५ का महिला दिदीबहिनीहरूलाई लक्षित गरी सञ्चालन गरिएको साईपाटा सजावट सम्बन्धी हस्तकला तालिमको समापन समारोह सम्पन्न भएको छ।
समापन कार्यक्रममा कार्यवाहक नगर प्रमुख सुशीला अधिकारीले महिलाको आर्थिक सशक्तीकरणका लागि उद्यमशीलतामूलक तथा सीपमूलक तालिमहरू प्रभावकारी माध्यम भएको बताउनुभयो। उहाँले साईपाटा सजावट जस्ता हस्तकलाका सीपले महिलाहरूलाई घरमै बसेर आम्दानी गर्ने अवसर सिर्जना गर्नुका साथै घरेलु उद्योगको विकासमा टेवा पुग्ने उल्लेख गर्दै नगरपालिकाले आगामी दिनमा पनि स्थानीय उत्पादन, उद्यम प्रवर्द्धन, बजारीकरण तथा सीप विकाससँग सम्बन्धित यस्ता कार्यक्रमलाई प्राथमिकताका साथ सञ्चालन गर्दै महिलाहरूको आर्थिक तथा सामाजिक सशक्तीकरणमा विशेष जोड दिने प्रतिबद्धता व्यक्त गर्नुभयो।

यसैगरी वडा नं. ५ का अध्यक्ष महेश रिमालले सीपमूलक तालिमले महिलाहरूलाई आत्मनिर्भर, आत्मविश्वासी तथा उद्यमशील बनाउन महत्वपूर्ण भूमिका खेल्ने बताउनुभयो। उहाँले स्थानीय आवश्यकता र बजारको मागअनुसार सञ्चालन गरिने यस्ता आयआर्जनमुखी तालिमहरूले महिलाहरूलाई स्वरोजगार तथा साना उद्यमतर्फ प्रेरित गर्ने विश्वास व्यक्त गर्दै वडा कार्यालयले आगामी दिनमा पनि यस्ता कार्यक्रमलाई निरन्तरता दिने र स्थानीय महिलाहरूको क्षमता विकासका लागि आवश्यक सहयोग गर्दै जाने प्रतिबद्धता जनाउनुभयो।
कार्यक्रममा वडा सदस्य केशव थापाले सिकेको सीपलाई व्यवहारमा उतारेर उत्पादनसँग जोडिन सहभागीहरूलाई आग्रह गर्दै यस्ता तालिमले आत्मनिर्भर समाज निर्माणमा महत्वपूर्ण योगदान पुर्‍याउने बताउनुभयो। समापन कार्यक्रममा प्रशिक्षार्थीहरूलाई प्रमाणपत्र वितरण गरिएको थियो। साथै तालिममा सहभागी महिला दिदीबहिनीहरूले आफैंले तयार पारेका साईपाटा सजावटका सामग्री तथा अन्य आकर्षक हस्तकलाका सामग्रीहरू कलात्मक ढंगले सजाएर प्रदर्शनीसमेत गरेका थिए। उक्त प्रदर्शनीले सहभागीहरूको सिर्जनशीलता, सीप र उत्पादन क्षमतालाई उजागर गर्नुका साथै कार्यक्रमको मुख्य आकर्षण बनेको थियो।