धार्मिक आस्था, सांस्कृतिक सम्पदाको संरक्षण तथा पर्यटन प्रवर्द्धनलाई थप सशक्त बनाउने उद्देश्यका साथ चन्द्रागिरि नगरपालिका र नागार्जुन नगरपालिका बीच ‘बद्रीनारायण मन्दिर परिसर पूर्वाधार निर्माण योजना’ सम्बन्धी महत्वपूर्ण सम्झौता सम्पन्न भएको छ।
दुई स्थानीय तहबीच भएको उक्त सम्झौताले बद्रीनारायण मन्दिर परिसरको संरक्षण, सौन्दर्यीकरण तथा आवश्यक भौतिक पूर्वाधार निर्माणलाई प्राथमिकता दिँदै धार्मिक तथा पर्यटकीय गन्तव्यका रूपमा क्षेत्रको विकासमा नयाँ आयाम थप्ने अपेक्षा गरिएको छ।
सम्झौताअनुसार मन्दिर परिसरमा श्रद्धालु तथा पर्यटकलाई सहज हुने पूर्वाधार निर्माण, वातावरणीय सुधार, पहुँच विस्तार तथा आवश्यक सुविधाहरूको विकासका लागि दुवै नगरपालिकाले आपसी समन्वय र सहकार्यमा योजना कार्यान्वयन गर्नेछन्।
स्थानीय जनप्रतिनिधिहरूले यस योजनाले धार्मिक पर्यटनको विकास, स्थानीय संस्कृति र सम्पदाको संरक्षणसँगै स्थानीय अर्थतन्त्रलाई समेत टेवा पुग्ने विश्वास व्यक्त गरेका छन्। साथै, दुवै नगरपालिकाबीचको सहकार्यले साझा विकासका योजनालाई प्रभावकारी रूपमा अगाडि बढाउने आधार तयार भएको उनीहरूको भनाइ छ।
बद्रीनारायण मन्दिर क्षेत्रलाई व्यवस्थित र आकर्षक धार्मिक–पर्यटकीय गन्तव्यका रूपमा विकास गर्ने लक्ष्यसहित भएको यस सम्झौताले स्थानीयवासी, श्रद्धालु तथा पर्यटक सबैलाई दीर्घकालीन रूपमा लाभ पुग्ने अपेक्षा गरिएको छ।
