सडकमा आश्रित सहयोगापेक्षी मानिसहरुलाई आश्रय प्रदान गर्ने उद्देश्य सहित ‘शहीद धर्मभक्त माथेमा महानगर मानवसेवा आश्रम निर्माण’का लागि सम्झौता भएको छ । काठमाडौं महानगरपालिकाको आर्थिक लगानी रहने गरी आश्रम भवन निर्माण र सञ्चालनका लागि महानगरपालिका, नागार्जुन नगरपालिका र मानवसेवा आश्रम बिच त्रिपक्षीय सम्झौता गरिएको हो । सीतापाइलास्थित नागार्जुन नगरपालिकाको कार्यालयमा सोमबार सम्पन्न सम्झौतामा महानगरका तर्फबाट महानगर प्रमुख विद्यासुन्दर शाक्य, नागार्जुन नगरपालिकाका तर्फबाट नगर प्रमुख मोहनबहादुर बस्नेत र आश्रमका तर्फबाट अध्यक्ष रामजी अधिकारीले हस्ताक्षर गर्नुभयो । सो अवसरमा महानगरपालिकाकी उपप्रमुख हरिप्रभा खड्गी श्रेष्ठ सहित अन्य जनप्रतिनिधिहरु, नगरपालिकाकी उपप्रमुख सुशीला अधिकारी सहित जनप्रतिनिधहरु, महानरपालिकाका प्रमुख प्रशासकीय अधिकृत राजेश्वर ज्ञवाली सहित महानगरका अधिकारीहरु एवम् नागार्जुन नगरपालिकाका प्रमुख प्रशासकीय अधिकृत सुरेन्द्र थापा मगर,वडा अध्यक्षहरु,कर्माचारीहरु तथा आश्रमका प्रतिनिधिहरुको सहभागिता रहेको थियो ।
सम्झौता पत्रमा हस्ताक्षर पश्चात कार्यक्रमलाई सम्बोधन गर्नुुहँुदै महानगर प्रमुख शाक्यले भवन निर्माणमार्फत दीर्घकालीन प्रभाव पार्ने गरी मानवसेवाको क्षेत्रमा जोडिन पाउनु गौरवको विषय भएको बताउनुभयो । महानगरले यस अघि पनि सहयोगापेक्षी व्यक्तिहरुलाई आवश्यक्ता अनुसारको सहयोग उपलब्ध गराउँदैआएको साथै सडकमानवमुक्त समाज निर्माणका लागि आफूहरु प्रतिवद्ध रहेको उहाँको भनाइ थियो । यसैगरी महानगरपालिकाकी उपप्रमुख खड्गी श्रेष्ठले मानवसेवाका क्षेत्रमा महानगरपालिकाले गरेका कार्यहरुबारे चर्चा गर्नुहुँदै यस्ता कार्यलाई निरन्तरता दिइने बताउनुभयो । कार्यक्रममा नगरपालिकाका प्रमुख बस्नेतले तेतीसकोटी देवता रहेको देशमा यस्तो महान कार्यले राष्ट्रियता र नेपालीपन उजागर गर्नुका साथै मानवताको भावना बिकास हुने बताउनु भयो साथै यस्ता कार्यले एकछाक खाएर भए पनि अरुको छाक टार्नसक्नु पर्छ भन्ने भावनाको विकास हुने पनि बताउनुभयो । मानव सेवाका लागि महानगरले पुयाएको योगदान अत्यन्त महत्वपूर्ण रहेको र नगरपालिकाले समेत यस्ता कार्य गर्दैआएको बताउनुभयो । त्यस्तै कार्यक्रममा बोल्दै नागार्जुन नगरपालिकाकी उप-मेयर शुशिला अधिकारीले मानव सेवा आश्रमले गरेको कार्यप्रति धन्यवाद व्यक्त गर्दै भोलिका पुस्ताको लागि यस्तो कार्यले राम्रो सन्देश जाने पनि बताउनुभयो । त्यस्तै मानव सेवा आश्रमका अध्यक्ष रामजी अधिकारीले कसैले पनि बेसाहारा भएर बस्न नपरोस् भनेर यो महान कार्यको थालनी गरिएको बताउनुभयो । उँहाका अनुसार यो बन्न लागेको मानव सेवा आश्रमको १० औँ भवन हो । यो कार्यमा सहयोग गरिदिनुभएकोमा काठमाडौँ महानगरपालिका र नागार्जुन नगरपालिका प्रति कृतज्ञ रहेको बताउनुभयो । कार्यक्रममा नगरपालिकाको वडा नम्बर ६ का अध्यक्ष राजेन्द्र बुढाथोकीले सम्झौताप्रति खुशी व्यक्त गर्नुका साथै यसको प्रभावकारी कार्यान्वयनका लागि पूर्वाधार निर्माणमा समेत सहकार्य गरिनु पर्ने बताउनुभयो । सम्झौताका लागि यस अघि महानगरपालिकाको गत असोज १२ गतेको र नगरपालिकाको असार २१ गतेको कार्यपालिका वैठकले निर्णय गरेको थियो । १६ बुँदे सो त्रिपक्षीय सम्झौता पत्रका व्यवस्थाहरु बारे जानकारी गराउनुहुँदै महानगरका सूचना अधिकारी समेत रहनु भएका कानून तथा मानवअधिकार विभागका प्रमुख वसन्त आचार्यले महानगरपालिकाले भवन निर्माण, आवश्यक फर्निचर तथा सजावट सहितको सम्पूर्ण कार्यका लागि आर्थिक सहयोग उपलब्ध गराउने बताउनुभयो । त्यस्तै, नागार्जुन नगरपालिकाले आश्रम भवन निर्माणका लागि जग्गा उपलब्ध गराउने छ ।
भवन निर्माण पश्चात मानव सेवा आश्रमले त्यसको सञ्चालनमार्फत सेवा प्रवाह गर्नेछ । भवन निर्माणका लागि नगरपालिकाले वडा नम्बर ६ डाडा गाउ स्थीत वागीश्वरीमा १८ रोपनी जग्गा उपलब्ध गराएको छ । नगरपालिका कार्यालयबाट ३ किलोमिटर दुरीमा रहेको वागीश्वरी डाँडाँको सो सार्वजनिक जग्गामा भवन निर्माण गरिँदैछ । सम्झौता पश्चात महानगरका प्रमुख शाक्य, उपप्रमुख खड्गी श्रेष्ठ सहितका प्रतिनिधिहरु प्रस्तावित जग्गाको अवलोकनमा जानुभएको थियो ।
